返回列表 回復 發帖

第三天玩水, 好開心可以見到海豚, Virgin Island果然係靚!

day3...
遊記 + 相
http://www.fotop.net/darkside/cebu2009day3

Day 3 - 17/12/2009
Amorita Resort => Balicasag Island => Virgin Island => Amorita Resort

by pigfong & darkside

今日約o左船家出海, 天未光5:15am就要起身了, 快快刷牙洗面再執齊行裝, 跟住就出去喇, 由於我地今日唔會響酒店食早餐(因為太早未有早餐), 所以琴晚已經去reception請佢地為我地安排一人一個早餐盒拎上船食。 去reception度拎完早餐之後6am就起程了, 一落去alona beach就已經見到船家喇, 不過得佢一個人咋, 唔似其他遊記所講有幾個人, 甚至一家人一齊出海。 架船都ok啦, 係有d嘈(係好嘈…), 睇落可以坐約6人。 開船o既時候剛好日出, 景色好靚, 話時話都唔知幾多年冇見過日出了…(見IMG_1665 ~ IMG_1675)。





開船之後我地就享用resort o既早餐盒了, 有吞拿魚沙律三文治, 沙律, muffin, 西瓜, 芒果同一枝水, 都幾好味丫(見IMG_1669)~



今日行程第一站係睇海豚, 架船行o左大約45分鐘之後船家就開始慢駛了, 見到有好幾架船響附近一齊睇, 有架仲有十幾廿人呢, 我地2個人霸一隻船, 好似豪客咁~~XDD, 之後船家同我地都開始四圍望, 初時仲驚無得睇, 搵o左一陣, 終於都見到海豚o既蹤影喇! 仲好多條添, 佢地間唔中先會遊出水面, 所以好難先睇到佢地, 仲好難影添!!! 另外每當見到遠處有海豚o既時候其他船都會一齊駛埋去, 一駛埋去d海豚就潛水失蹤了, 又要搵一輪先至再搵到…不過即使係咁我地已經好開心了, 都係第一次親眼睇到海豚在海中暢泳~(見IMG_1678 ~ IMG_1722)。






我地o係海中心兜來兜去, 睇左大約1個鐘就去下一站了。下一站係去Balicasag Island浮潛, 大約半小時就到, 上島後船家帶我地去個簡陋檔口(可以響度食早餐的)度著o左件自製救生衣(好簡陋的), 果度d人話我地著涼鞋(有得cool住腳唔會甩o個種)會俾岩石珊瑚整損腳, 猛咁叫我地租對潛水鞋, 我地見都玩過咁多次浮潛啦, 覺得冇需要, 所以就堅持唔租了, 最終係無事的! 另外由於我地又自備左mask(香港買o既cheap o野, HKD100 only), 又唔使租, 所以佢賺唔到我地錢呢。準備好之後, safeguard就帶領我地出海喇, safeguard要俾200p, 初時仲以為係200p 2個safeguard添, 原來得一個…由岸邊坐細船出去無耐就落水lu, 唔錯, 有好多魚仔, 起初個safeguard都有帶我地周圍睇o下o野, 同幫我地影相的, 點知唔夠一陣佢就自己返上船, 由得我地浮了, 感覺懶o左d law!!




我地今次醒目呀, 學人地預先將d麵包整碎入落d膠樽度



落到水加d海水搖勻就可以好輕鬆咁餵魚喇, 只要唧唧下d魚仔就會游埋o黎食, 好開心呢~~(見DSC06957 ~ DSC07060), 游出少少就會見到無啦啦sharp cut入深海, 深不見底嫁, 果度d魚大條好多, 但我地一游出少少就俾個safeguard叫返返去了。其實淺水已經有好多魚仔喇(雖然同其他東南亞地方一樣大部分都係o個d間條魚…), 仲有mo仔添呀, 原來mo仔都鍾意食麵包的…









玩左個幾鐘, 餵晒d麵包之後就返上岸lu, 又係sell o野o既時間, 島上d人拎d紀念品俾我地睇, 其實唔係好靚嫁咋, 不過我地見無幫趁佢地租鞋同mask, 又冇響o度食早餐, 所以最終都求其買左2條鯊魚牙頸鍊(350p)當做個記念啦。

9點幾就上返公仔佬船家架船了, 見好多人都話Balicasag Island o既Dive Resort好靚, 原本想去參觀o下影o下相的, 點知船家話十分low tide, 埋唔到去, 所以我地只有離遠望o左佢一眼之後就走了。

下一站Virgin Island, 距離Balicasag Island都幾遠, 差唔多要一小時, 去到Virgin Island附近, 明明已經見到好近, 點知船家又駛去另一邊, 原來又係因為low tide, 所以隻船要響Virgin Island附近左穿右插, 好似行秘道咁避開水底d珊瑚, 好想知究竟船家點樣認得o黎條海上秘道o既呢=P…..(見IMG_1738 ~ IMG_1744)



幾經辛苦終於都埋到岸喇(見IMG_1745), Virgin Island其實係一個無人小島, 長長沙路, 中間有堆綠洲(椰樹), 有d世外桃源feel, 影相都幾靚o既, 美中不足係水位實在太低了, 露左好多海草出o黎, 扣左少少分(見IMG_1752, IMG_1852 ~ IMG_1862), 不過亦係因為咁, 我地響岸邊見到好多海星&其他不知明海洋生物呢~~呢個島無遮無擋, 我地一邊行一邊影下相, 玩下海星咁, 好快又玩左個幾鐘, 無遮無擋真係幾難頂, 唔覺唔覺就曬到燶左喇…







我地行到去大約島中間就回程了, 上島o既時候係冇乜人的, 回程o既時候就開始見到有其他遊客來了。 返到去船附近, 有位嬸嬸賣海膽, 見佢d海膽都幾新鲜丫(見IMG_1870 & IMG_1871), 仲郁緊架, 所以忍唔住試下, 50p 3隻, 其實應該可以再平d, 但我地唔知好唔好味, 打算試少少先, 好味至講價食多幾隻, 個阿嬸手起刀落, 好快就開左個海膽, 一fing就fing走d內臟, 用水沖下就刮d肉俾我地食, 味道係…好, 好, 好咸呢!!! 不過dap真d都有一絲海膽味o既, 之後佢話加d coconut vinegar會好味d, 試o左隻, 酸酸地好古怪, 仲冇晒海膽味添! 菲律賓o既海膽, 試過喇, 夠了~



食完海膽就上船, 又要沿住秘道出返去, 最終12點幾就已經返到Alona beach了, 今日o既boat trip就此結束了, 價錢1200p, 俾多150p tips。

::Album::Travel Log::
http://www.fotop.net/darkside

續day3...

由於時間尚早, 我地返酒店放低d野就出Alona Beach再玩過, 衝落水, 原來響酒店附近o既沙灘浮潛已經有好多野睇嫁喇, 除o左大量海草之外, 仲有好多海星, 海膽這一家, 魚仔同水母等等等等(見DSC07123 ~ DSC07164), 好彩我地有自備snorkeling mask咋, 原來係咁有用的! 不過冇自備o既話應該可以向酒店, dive shop租的~






響alona beach浮完一輪, 之後再返resort個infinity pool玩, 個泳池其實好細, 不過勝在可以望住沙灘…影左陣相再返自己房o既jacuzzi, 不過個jacuzzi太陽曬唔到, 所以有d凍無乜享用。返到房o既時候岩岩有人執緊房, 但我地諗住沖個身之後再出去架喇, 唯有叫佢地一陣再返來啦。

4點幾沖完身又再出去Alona Beach lu, 一落到去就見到好多人響度玩樂器同跳舞, 原來係隔離間resort d staff響度綵排呢, 又跳得幾好喎。



今次我地決定行到去Alona Beach盡頭, 其實Alona Beach真係唔大, 約30分鐘就可以行完, 不過我地行下又影下相咁, 沿途有好多大大小小o既酒店, 餐廳咁啦(見IMG_1924 ~ IMG_1950)。




行到盡頭時見到幾個菲律賓小朋友, 其中一個無著褲, 好自豪咁走來走去, 佢地見我地拎住相機就好開心咁俾我地影相, load返d相俾佢地睇時佢地好興奮呢(見IMG_1953 ~ DSC07211), 見佢地咁得意, 於是專登去士多買o左包朱古力請佢地食, 佢地都好開心呢。






去到Alona beach盡頭之後就調頭了, o黎個時間已經差唔多日落喇, 由於地理位置問題, Alona Beach對唔正日落位, 不過日落時分o既Alona beach都幾靚丫(見IMG_1976 ~ IMG_2004), 好懷念響Boracay訓響沙灘就可以睇日落…






好喇, 又係時候搵地方食飯喇! 睇o下手上o既資料, 最後揀o左一間叫Power Keg, 不過頭先行晒成個沙灘都唔覺眼bor, 最後問完人至知原來Lost Horizon隔離有條路可以行返出去main road架, o黎幾日經過o左Lost Horizon幾次都唔知添!!! 出到main road轉左就見到Power Keg架喇, 佢係一間平民餐廳, d野食好平, 我地叫左個蝦pizza同一個牛肉批, 仲有pineapple shake & mango shake(見DSC07221 ~ DSC07228)。個pizza竟然又幾好味, 至少好味過尋晚Hayahay果個啦, 至於牛肉批就麻麻地, 入面d牛肉似牛腩多d, 好’鞋”, 而2個shake都ok啦, 最後埋單都係490p, 真係平靚正, 抵到爛呀!





又根據資料顯示, 話Bohol o既燒雞好正, 一場o黎到點都要試下啦, 其實o黎幾日都有留意o下邊o度有得食, 點知搵唔到, 原來燒雞檔又係響main road的, Power Keg附近就有一檔(見附近餐廳都有得賣, 唔知邊個好味d…), 我地去完Power Keg之後就去買左一隻(180p), 跟住就返resort慢慢嘆了, 返到去仲係好熱辣辣呀, 我地用手撕o黎食, d肉一d都唔鞋, 加埋佢d醬汁真係超好味呢, 唔怪得有人話咁大個人食過最好味o既燒雞就係響菲律賓, 原來係真架!!



2個人食晒成隻燒雞, 好飽, 又見都仲係好早, 於是又出去周圍影下相, 順便當散步嘛, 之後又坐響d沙灘椅度睇星星, 好浪漫呢(見IMG_2038 ~ IMG_2074)。 今日咁早起身, 玩o左成日, 已經好累喇, 最終hea到9點幾就返房準備休息了。





::Album::Travel Log::
http://www.fotop.net/darkside
我都好回味果邊燒雞嘅味道.haha...
但有一次嚮馬尼拉sm mall臨回港前,買隻燒雞再回港食
但d肉質同味道都爭d.但可能回到屋企又放入雪柜,第日先食
就影嚮左law.haha...

去virgin island真糸好講時間喎,太高潮又無左條沙堤
太低潮又難埋岸,同埋d珊瑚礁石/海草露曬出來,影嚮境觀.
virgin island我都無去過.

好多人一見到alona beach海邊好多海草,就覺得好核突
(有咩咁核突 ,海中草地咋嘛)因此不落alona beach浮潛
其實好side料,過左d海草群,再深d水,又係好多珊瑚群落,
同balicasag island不惶多讓,好在你地第3日都有落水.

睇睇下呢,我覺得你今次寫得好睇過上次
唔知系咪你今次無咁多文字,精簡d,適合我e d 懶人,haha....
D 相好靚 wo
用400D, 但是否 kit lens ? 我想不是吧
Welcome to My Sampig Blog  
http://hk.myblog.yahoo.com/sam-pig
我都估應該系獨立買貴鏡頭,
相片好sharp.
原帖由 pacific108 於 2010-1-16 09:00 發表
我都好回味果邊燒雞嘅味道.haha...
但有一次嚮馬尼拉sm mall臨回港前,買隻燒雞再回港食
但d肉質同味道都爭d.但可能回到屋企又放入雪柜,第日先食
就影嚮左law.haha...

去virgin island真糸好講時間喎,太高 ...
所有食物都係新鮮整起o個陣最好味~好想再食多次...去o左咁多日淨係食得一隻咋...

係啦, alona beach已經有好多o野睇! 所以我day4都有再浮過, 不過唔敢游太出, 怕會有船經過

哈哈~因為想快d攪掂晒佢, 下個月去另一個trip XDD
::Album::Travel Log::
http://www.fotop.net/darkside
原帖由 sam_pig 於 2010-1-16 09:06 發表 [url=redirect.php?goto=findpost&pid=151897&ptid=21209][/url]
D 相好靚 wo
用400D, 但是否 kit lens ? 我想不是吧
原帖由 pacific108 於 2010-1-16 09:09 發表
我都估應該系獨立買貴鏡頭,
相片好sharp.
lens係 canon 17-55mm 2.8 IS, 影海豚o既就係 canon 55-250mm IS
::Album::Travel Log::
http://www.fotop.net/darkside

今日要離開bohol了, 好唔捨得呢...Bluewater Beach Resort 間房都幾靚~

day4...
遊記 + 相
http://www.fotop.net/darkside/cebu2009day4

Day 4 - 18/12/2009
Amorita Resort => Cebu => Maribago Bluewater Beach Resort

by pigfong & darkside

話咁快就o黎o左4日喇, 今日無安排咩特別活動, 點知7:40am無啦啦俾個電話嘈醒o左, 原來係front desk打來, 事原我地尋日打去request late check-out, 佢晨咁早打o黎就係想話我地知可以延遲到1點至check-out, 其實唔駛咁早打o黎話呢個好消息俾我地知o既…..只係可以遲一個鐘, 好過冇啦。

8點幾又出去Saffron食早餐了, 今日d野食同前日有少少唔同, d熱盤無咁吸引了, 前日好好味o既肉醬冇o左lu…好想再食呀! 好彩pancake同奄列依然健在, 一樣咁好味(見IMG_2081 ~ IMG_2090)。





食完就響酒店入面行下同裝下其他房, 住o左幾日都冇好好參觀過間resort添….行完之後, 我地都係覺得我地o既房type (garden villa)最好呢, 有私家Jacuzzi得o黎又夠隱敝, 而ocean villa雖然對住個大海都好正, 不過個Jacuzzi對出o既草地係人都可以行去的, 即係浸浸o下Jacuzzi出面可能會有路人甲乙丙經過~~




兜o左一陣, 見今日又係咁好天, 同埋已經係最後一日o係保和島了, 所以點都要玩盡佢, 我地9點幾又落Alona Beach浮潛lu, 今日見到o既野仲多過琴日, 首先見到一堆魚仔群, 佢地成班咁游來游去非常合群, 好攪笑呢(見DSC07242 & DSC07243)



之後又見到mo仔, 竟然o係alona beach就可以搵到mo仔(見DSC07257)!



跟住又有藍色海星, o黎d藍色海星比較少見, 好靚(見DSC07268  & DSC07274 )~ 再之後浮浮下, 見到有隻超巨海星, 諗住執佢上來影張合照啦, 點知一反過來就見到恐怖o既一幕…原來佢食緊隻海膽呀(見DSC07302 & DSC07303)!!! 真係識食呀下…



除此之外當然唔少得其他海星呀, 魚呀, 海膽咁啦, 好多o野睇!







玩到差唔多11點就返resort了, 再o係泳池hea o左陣, 跟住就返房沖涼&執行李喇, 執完就梗係要響房度留下倩影啦(見IMG_2106 ~ IMG_2166), 有間咁正o既房, 實在唔捨得離開!






我地2個無賴人死都hea到1點至肯check-out, 今日我地會搭4.30pm船返去cebu, 所以check-out時順便book埋酒店車3pm送我地去碼頭(500p), 跟住就落沙灘食lunch了, 今日都係好好天好熱, 唔想坐響沙灘食野呢(見IMG_2174 ~ DSC07388), 原本想食返第一晚食果間餐廳(Jasz), 點知佢又無開喎, 最終去左Trudis’ Place, 叫左一條steam LapuLapu, 一個蝦意粉, 仲有pineapple shake同papaya shake (有人唔知點解撈亂o左papaya同椰子 -_-“), 個蝦意粉味道ok, 係酸左少少, 食完之後又等o左好耐個LapuLapu至到, 味道唔錯, 不過唔夠第一晚o個條好, 而飲品就麻麻地咋, 埋單510p(見IMG_2182 ~ IMG_2190)。





由於等o野食等o左好耐 (o黎左幾日發覺呢度間間餐廳上菜都上得好慢!!!), 食完o野已經差唔多夠鐘返resort搭車喇, 行返resort o既中途又唔執輸咁係咁影相, 陽光普照下o既alona beach實在好靚(見IMG_2196 ~ IMG_2226)






雖然酒店車係貴o左少少, 但我地懶得格價, 而且酒店車質素有保證, 所以決定豪俾佢啦。 3點上車, 中途又落大雨, 前日下午都係無啦啦落大雨呢, 好彩2日都對我地o既行程影響不大。 大約半個鐘就到達碼頭, 首先要去Weesam counter換飛同mark埋位, 之後再去另一個counter俾terminal fee (每人11.25p), 由於碼頭冇咩好行(只有間cafe同一間士多之類o既舖頭), 所以俾完terminal fee就入閘了。

入閘時又要過x-ray, 之後寄行李, 今次寄行李counter果個阿叔竟然開價100p, 去程只係40p(2件)咋, 睬佢都傻呀, 其實果度寫明頭15kg係免費, 過左至要計錢, 不過我地費事同佢嘈, 只係話去程只係40p, 講o左一陣佢就話40p ok, 之後就入候船室等上船了。

呢度似乎大過Cebu果邊個候船室, d櫈都好舒服d, 同埋同樣有人唱歌(見IMG_2244)。 等到4點零就上船了, 準時4:30pm開船, 同去程差唔多, 冷氣唔覺凍, 不過船上電視聲浪照舊好大, 冇咩點訓…




::Album::Travel Log::
http://www.fotop.net/darkside

2小時之後, 6:30pm就返到Cebu了, 可能因為隔離supercat都o岩o岩有船到,所以碼頭好多人又好多車, 我地好辛苦至截到一架肯用meter o既的士, 點知上左車行左陣佢就話meter只限cebu city, 我地去果度(Maribago Bluewater Beach Resort) 唔用得meter喎, 講講下又話要400p, 我地唔肯, 之後又話計meter都得, 但要成粒鐘, 由於驚佢兜路, 所以最後叫佢車我地返碼頭截過第二架算! 今次target係200p, 點知連截幾架都話塞車唔肯, 好彩果度有個好好人o既security哥哥, 佢好努力咁幫我地截的士, 幾經辛苦終於都搵到架, 不過要300p, 冇計啦照搭…沿途有d位都塞塞地, 最後搭o左成45分鐘左右, 7點幾至去到酒店。

最後2晚住o既酒店叫Maribago Bluewater Beach Resort, 酒店守衛深嚴, 未check-in入去時要出示voucher, 入到去check-in啦, 之前上網揀酒店o既時候見佢有種房type幾新幾靚, 叫Premiere Deluxe Room, 不過我地個package只得Deluxe Room, 所以就直接send email去酒店問可唔可以俾錢upgrade, 而酒店方面服務幾好, 回覆好快, 最終我地加o左2000p/night轉去Premiere Deluxe Room。

Check-in完酒店職員就開高爾夫球車送我地返房了, 幾分鐘就到喇, 間房一出行幾步就係酒店o既私人沙灘, 雖然無Amorita間房咁靚, 但都滿意啦, 尤其係個浴缸, 好有style~~(見IMG_2248 ~ IMG_2265)






放低行李就出去食飯lu, 今晚食飯o既地方叫Maribago Grill, 起初就咁睇個名以為係o係resort入面的, 其實係o係酒店外面架, 行出酒店門口轉左會見到大馬路, 跟住轉右行大約2分鐘就會見到呢間餐廳。其實Bluewater附近咩都冇, 好似d民居咁, 不時有車經過, 而夜晚周圍都好黑, 所以一出去o既時候都覺得幾恐怖。

去到Maribago Grill, 果度好特別, 佈置到好似響個樹林入面食野咁(見IMG_2281), 環保清靜, d waiter唔會行來行去或者過o黎阻住你, 有咩需要只要搖下枱面個鈴鈴就有人會過o黎serve你。




飲品方面我地叫左Lychee Buko Shake同Maribago Shake, 前者味道ok, 至於Maribago Shake原來係Mango + 芋頭, 芋頭味好香, 好似飲緊奶昔咁, 係全個trip最好味o既飲品(見DSC07410)! 至於食物就叫左Baked Scallop, 有好多隻, 有d牛油同芝士響面咁焗, 好味。 菜就揀左Adobong kangkong, 即係通菜, 不過味道怪怪地, 酸酸地, 唔係食開o既口味…之前響人地d遊記見到有個炒粉絲之類o既o野話好好味, 研究左好耐估計應該係指Bam-e, 食落又真係幾好味喎, 口感有點煙韌, 值得推介! 除o左Bam-e, 另外再叫多個Garlic Crab, 呢個隻蟹唔算多肉, 不過d汁送飯一流, 係咸o左少少o者(見DSC07414 ~ DSC07424)…食左咁多o野埋單都係900p咋, 好滿足呢~~







食飽飯之後就原路返酒店了, 酒店門口對面有一間massage店, 我地諗住聽晚去做massage, 所以去拎o左張單張, 之後就返resort了。 返到去周圍兜o左陣, 酒店四周所有樹都掛上o左d星星燈, 就連我地間房間口都有, 而lobby就有棵用稻草整成o既聖誕樹, 好有氣氛(見IMG_2284 ~ IMG_2298)。 十點零就返房準備休息了。




::Album::Travel Log::
http://www.fotop.net/darkside
d 相真係超靚, 海底又超清
返回列表