返回列表 回復 發帖
原帖由 rubypuiman 於 2009-7-9 12:01 發表
很開心, 終於這裡有新post, 期待你的遊記, 正計劃下年到越南一游, 請問樓主自游行方便嗎?
你是香港人嗎?
其實並不難呀,不過我呢個七日六夜旅程就準備左成半年左右啦﹗因為講真香港真係無咩越南的旅遊書﹗好多時間都要上網搵資料﹗
好多人都覺得越南又雜又落後,其實都唔算係,我成個旅程亦都無俾人呃過,一切好順利﹗
hk書真係唔多.
可唔可以分享埋其他實用資料, e.g.住宿, 交通, 網站etc
原帖由 qiqi 於 2009-7-9 13:14 發表
hk書真係唔多.
可唔可以分享埋其他實用資料, e.g.住宿, 交通, 網站etc
我係去專業買package的﹗機票連兩晚胡志明酒店就$2200﹗
之後其他房間去Asiaroom訂,你去search佢網址就可以搵到了﹗
第三天是在胡志明的最後一天,應該話係半天,因為下午會搭飛機到大叻﹗
這個上午我地安排了到Vietnam Cookery Centre學煮餸

集合地點是檳城市場,在越南這幾天我地發現了越南人都幾鍾意遲到,也許是太悠閒了吧,又或許是我們太認真吧﹗

我等人不如人等我就算,去食碗Bun Bo 牛肉檬做早餐先﹗係香港未食過這種外型似米線,口感似煙韌的檬粉,好食!!
檳城市場都幾大幾好行,亦都乾淨,不過賣的東西就唔多等洗,都係食野最划算﹗

大廚駕到,不過佢老哥只係識講越南文,翻譯就交左俾佢身邊既姐姐喇﹗
大家睇不睇到右手面的老外學生對個大廚抱住好懷疑既目光

檳城市場買餸應有盡有,呢檔就係賣內臟啦﹗

大廚其實都係行行企企,講解就交俾姐姐處理﹗
其實我都可以扮啦﹗

另一個姐姐正在介紹蘆薈同其他越南菜常用的香草,佢最後仲自己係街市買左一個醃過的鴨蛋俾佢囡囡。

越南人排海鮮十分整齊,這個蟹陣現場睇幾壯觀!

大廚單手插袋,自己買自己嘢,被佢吹脹,行埋佢度就只係識得對住我地笑﹗都唔知同佢來做咩春﹗
佢唯一的作用是有頂高帽引路•

逛完菜欄後,自費打的到廚藝學校。

這就是我們的課室,裝修以木為主體,地方乾淨簡潔而舒適,唯一唔好當然係無冷氣啦﹗第一次旅遊學煮餸,好緊張﹗。

上堂前同一打西餅茶敍,佢地就係我地既同學仔喇﹗
好多都是來自澳洲同英國。佢地見到我地用蚊貼時十分好奇,猛問我地:"What are these?" "Where did you get them?"

成立o左10年,係由一個法國mix越南混血女人開嘅!

上堂喇,大廚依然講越南文唔知佢講咩,前面姐姐就負責用英文講解﹗
好驚呀,一邊學會一邊問問題考你架!
我地的團隊由於過度活躍成日細聲講大聲笑大比數贏了老外團,答中哂,勁呀!

第一味是學整春卷
首要學整點春卷用的醬汁,整得好要甜酸鹹辣都食到,賣相方面就要蒜頭粒、辣椒粒浮面先叫做合格!!

其實材料已經切好哂,我地既工作就係攪勻蟹肉同豬肉等等,用春卷皮包好,由於好緊張會包到散開哂,相都無拍到!!

食家作品-包得實淨d係好食d!

食得喇﹗
我覺得自己整得好好味﹗

呢度每天都有唔同既餸菜主題,我地咁岩星期三,今日係煮我唔食的.................
首先第一個係焦糖辣魚煲!

鱸魚兩邊剪香,再加水及調味。

煮至收乾哂水,再灑下蔥花即成!

最後是整個魚湯,蕃茄菠蘿魚湯

都係隊唒d嘢落去,無咩特別!

越南人興食完飯先飲湯架!

魚十分惹味,大家都清哂自己的辣魚煲,個湯就連老外都話Tom Yum Kum同中國湯好味好多!
不過講真呢度教煮的野食調味很重,應該話係過重,落好鬼多糖同魚露,也許越南人愛吃濃味的東西吧﹗
幸好我性格反叛,見唔多對路就自己偷偷地落少0的,唔係一定甜死或鹹死﹗

最後,整色整水咁有個畢業典禮,大廚會一個又一個頒番個證書俾你,其實都係同大廚既合照時間吧﹗
仲有細細袋的黑椒同埋當日學過既餸菜食譜作為紀念品。

8:30am玩到1:00pm,費用美金預早交收,大約港幣三百蚊左右吧,在第二個國家可以學下煮地道既菜色是很難得的事,一大班人學野也從未試過,感覺新鮮得意過癮,抵玩﹗
食飽飽的人回酒店取回行李,又出發到機場去大叻了....................
更多相來呢度睇:
http://www.facebook.com/album.php?aid=89002&id=632416375&l=34ecf8b3e1
真係要讚一次你嘅遊記,真係寫得好生動有趣,好睇

e個著餸課程要成300蚊,我真係唔捨得玩.
原帖由 pacific108 於 2009-7-10 14:42 發表
真係要讚一次你嘅遊記,真係寫得好生動有趣,好睇

e個著餸課程要成300蚊,我真係唔捨得玩.  
多謝讚賞,希望你地都睇得開心﹗
胡志明玩左兩日半就要走人。
商場未行過,最想行嘅超市唔多覺眼有Circle K就有入嘅! 最大遺憾係無學當地人踎街滴漏咖啡!

趕到去機場,之前上網訂左Vietnam Airlines HK$300蚊一張機票去大叻,簡單輕鬆就入左閘!
聽人講如果坐車去要成六七個鐘,我就寧願俾多少少錢喇﹗

45分鐘就到左大叻可愛的小小機場!

呢架就係我地搭嘅飛機仔喇!
市中心離機場半個鐘啦! 大家係的士上見到大叻的法式建築已嘩嘩叫,覺得似去左lego童話村咁!

我地係大叻住嘅Novotel Dalat,入面古色古香,有殖民地色彩! 不過房就細些少,最大鑊係無冷氣!
因為大叻處於高原,全年都涼浸浸,不過對於我呢類怕熱人士,20度都係好需要冷氣!

房間望出去的景色!
之後步行去找旅行社訂嘢。

本來覺得頭頓已經好正,呢度又有另一種美,市中心有一個平靜的湖泊,浪漫滿瀉!

歐陸小山城

到了Sinh Cafe喇! 這是網友介紹最可靠的agent! 不過講英文都係煩,講得快同長都係會亂,好在有女團友負責講數!

買左去下一站美奈的旅遊巴飛,諗諗下都是join埋local tour,因為大叻唔同胡志明,唔係成街的士,景點又唔集中,包的都應該幾貴!
私人包團可以揀五個景點同時間,怕早起的食家一聽就話要報團! 一輪講價後,合共US$55,包入場費,不過就導遊只係包車。

Trong Dong Restaurant 係閃閃書推薦嘅! 講到好勁,說是「當地人和遊客都大讚的餐廳」。

大叻是越南有名的釀酒區。叫左支Dalat white wine試下,味道酸死人,都叫做試過咁話! 建議千祈唔好當佢做手信!

HK$22一條的招牌菜蔗蝦!

用米紙包住菜同香草來食,其實是蔗蝦係攪碎左的蝦同豬肉,但食不到蝦味同蔗的鮮甜,亦無口感,!

點了另一道招牌菜香草烤牛肉! 出奇地幾好味,香草又脆又嫩,不帶一點苦味,入面牛肉汁四溢!

不過之後黎嘅餸就唔0岩口胃,煮魚、貴價的海鮮湯等都叫人失望!  見全晚都係得我地一枱客,就知又一次俾閃閃老點!
問侍應姐姐邊度有燒海鮮食。佢怕我地唔識路,見就放工順便帶我地去! 行左都好遠,佢鬼咁熱心,唔通搏醒? 最後佢死都不要貼士!
真係一個好女仔!  同行友人說早知問佢攞電話睇下可不可以發展一段異地情......

呢間真係正正式式的local場!
老老實實所有食物上面都有烏蠅圍住,不過又係人一世物一世呢個道理既影響,所以都係試左先﹗

越南人好愛毒中之王螄蚶,我地無點黎食! 因為怕中毒返唔到香港﹗

不知名白雪雪怪螺,肉身實而爽,沾醬胡椒汁夠哂惹味!

炭爐燒扇貝

用左成噸香茅烚蜆,清甜鮮味!

香葉燒蟹鉗﹗

全場都係大BB專用小枱小櫈!
連宵夜都食埋,可以試到local野相當滿足﹗
係時候返酒店瞓覺了,這就是我們可愛的第三天了....
更多大叻相片:
http://www.facebook.com/album.php?aid=89106&id=632416375&l=424677ed21
轉眼又到第四天,呢日我地既活動就係大叻一天遊喇﹗

朝早起身食個靚靚早餐之後就出發,在Sinh Cafe包左車有司機車我地去大叻五大景點

大叻好鬼多瀑布,我地第一個要遊既係Datanla瀑布

老老實實個瀑布真係把鬼,是旦有坐山流0的水落黎就叫瀑布,真係未見過大蛇痾尿,對比起上年去台北十分的瀑布都是蚊比同牛比﹗

不過呢度有樣好,就係有呢架車玩,由山頂滑到落山腳全程成五分鐘仲要自己全自助控制快慢相當刺激,就算瀑布唔得都要來玩一次﹗
記得買來回飛,因滑左落山腳最緊要有車拉番你上來,唔係行樓梯登山一定會中毒兼中暑

黃色阿哥就係我地既司機喇﹗佢去到邊賭到邊,同我有得fight﹗
玩還玩不過佢十分有禮貌,帶隊亦有交帶跟得足,我地好滿意

第二站是普蓮瀑布,雖然比起頭先的好,不過大家有眼可見,都係流野來的﹗

同頭先一樣,瀑布雖然不美,但有第二樣值得玩的,就係騎大象

我同食家都係第一次騎象吧﹗
象是小象相當可愛,比幾十蚊就可以坐成十幾分鐘,大象會帶你在瀑布附近的一個草堆及小河行個圈,過程有趣亦過癮,幾鬼怕我太重會坐死佢
一路坐會有攝影師同你影相,之後你落地佢就俾你揀要邊幾張,即要即曬,HKD 15蚊張左右啦﹗難得有人幫我地影相,當然有幾多要幾多﹗
騎完象司機帶我地食lunch,之後就去左....

Crazy House瘋狂屋,呢度其實係酒店,不過可能設計得太瘋狂既關係好似無咩人入住,而家變左一個免費既旅遊勝地﹗

0的房間超級不倫不類亦都天花亂墜﹗

住就咪搞,但裝修很有趣建築亦從未見過,我敢講是當年香港虎豹別墅的十級進化版,來大叻唔好錯過﹗

Crazy完之後去左竹林禪院
可能在大叻算是特色的寺院,但香港大嶼山宏偉過佢廿倍,無咩特別﹗

寺院雖然無味,卻有全越南最長的纜車可搭,一路好風光呢﹗

總站可以遠眺大叻全景,很美呢﹗

最後一站是大叻火車站

由於已經下午四點關係,火車我地就無坐喇﹗
不過細細架仲係用煤發電的,夠哂古老,又任影任玩唔嬲,可以爬上去拍照,幾過癮架﹗

行埋火車站我地去左大叻市場,行下睇下有咩手信買﹗

點知入面全部都係賣0的好似溶緊既乾果同埋糖,我怕買左之後會俾人打,最後都係行個圈就走人﹗

大叻真不愧又名浪漫之城,成個城市都係咁既樣架,似不似在法國慢步呢?

行左成日天氣又好,我地去嘆番杯coffee,揀左春香湖旁的餐廳,相信有去過春香湖的一定認得﹗

湖面平靜,好多情侶玩天鵝水上單車,滿天都是紙鳶飛翔﹗

藍天碧海,望住呢個景色未飲酒都已先醉

第一次喝越南的滴漏咖啡,淨飲味道濃烈苦中帶鹹,是很一種特別卻不會想再喝的味道﹗

越南還是法包最美味,一人一個不會嫌多呢﹗

百吃不厭,材料夠多,香鬆脆齊哂﹗一百分﹗

這兒是Novotel的遊戲室,有我地幾個0係度嘈到保安要攞支警棍入來了解﹗
我們迷上了層層疊

看這位師兄的表情便知贏輸有命,上帝要你滅亡你必先要自宮才有出路﹗

夜晚去左閃閃書介紹既呢間HNL餐廳,佢又話自己係咩lonely planet介紹﹗
我地發現凡係lonely planet介紹的都係唔好食的﹗

全晚最好的是呢支西貢啤酒,其他食物相都費事貼
大叻搵食真係幾難,尋晚同今晚都吃不到美味的,只有吃景吃個飽﹗
雖然如此,大叻也絕對值得一來,來到你會發覺原來越南其實也有美麗浪漫既一面﹗
悠閒憩靜,地靈人傑,比胡志明少了份商業色彩卻增添幾份人情味,炎夏亦涼風送爽,舒服得不得了,我大力推介﹗
這就是我們的第四天....
原帖由 小連 於 2009-7-9 12:42 發表 香港真係無咩越南的旅遊書﹗好多時間都要上網搵資料
我覺得邊個地區都好.
好多旅遊書都廢嘅,凈係話你知邊度正,邊度好,
又唔講點去,注意事項、時間等,上網睇人地d遊記仲好
你寫得好精彩好好笑!!

唔知你可唔可以寫埋最後果3日?
因為我都想八月尾去!!
返回列表