返回列表 回復 發帖

兩個轆去洛磯山四圍LOOK-Day 7+8

開心嘅時間過得特別快,行程好快已經去到尾聲,跟d團友又玩熟咗,真係有d唔捨得。

喺離開呢個人生仙境之前,大隊坐支援車去 Yoho National Park 睇埋最後幾個景點,包括 Emerald Lake,Takakkaw Falls 同 Natural Bridge。

今次行程都睇咗唔少靚嘅瀑布,但要選最有氣勢嘅都係呢個高254米嘅 Takakkaw 莫屬。佢喺加拿大排名第三,啱啱喺我哋第一日睇過嘅 Helmcken Falls 之前。可以一次過睇哂幾個加拿大最有名嘅瀑布都算難得。



回程住喺  Kelowna,之前差不多日日西餐,終於可以轉吓口味,食番餐日本料理作為餞別。餐廳由老闆到侍應都係日本人, 所以百分百正宗日本風味,大家都覺得好好味好有水準。

原來 Kelowna 係加拿大嘅一個主要葡萄酒產區,襯今日大家唔駛踩單車,我哋去咗酒莊試酒兼食晏。加拿大人真係識嘆,喺咁靚嘅環境下傾吓飲吓,真係人生一樂也。唔講唔知,原來呢度出產嘅葡萄酒都好出名,尤其是冰酒就更加係熱門手信,所以我都每買咗支嚟做紀念。





勢估唔到我哋竟然可以成功完成呢個洛磯山單車之旅,除咗對自己單車技術嘅信心大增之外,仲認識到呢種另類旅遊,原來係咁開心自由,兼且可以接觸大自然,有別於一般鴨仔團。我女友竟然好似上咗癮咁,問領隊仲有d乜嘢啱佢玩,咁佢就介紹咗個 Okanagan 美酒佳餚 spa tour 俾佢,仲話佢哋公司其它嘅酒莊單車團都係超好玩,基本上只要識踩單車就可以應付自如,平均日踩20-30公里,大部份仲係平路,踩完單車就去品嚐美酒佳餚,盡情吃喝玩樂。聽佢講完我女友就想飛身報名啦,而我亦決定咗揾埋班 friend 組團返嚟,一於活在當下,享受人生
返回列表