返回列表 回復 發帖

兩個轆去洛磯山四圍LOOK-Day 6

今日離開 Lake Louise 向另一重點 Banff 進發。相對之前幾日,今日算係最輕鬆。除咗一小段斜坡外,Bow Valley Parkway 其實都好平坦兼且冇乜車行。



沿途樹木林立,領隊話喺呢條路最有機會見到動物㗎喇,話口未完就見到一隻鹿媽媽同兩隻鹿 BB。我哋郁都唔敢郁,驚嚇走咗佢哋。好采俾我影到嘅呢張靚相,都算不枉此行。領隊話有機會見到黑熊,雖然最終都係冇,但係今次嘅接觸已經十分難得,如果唔係踩單車,可能都遇唔到。



原來 Bow Valley Parkway 係一個本地人踩單車嘅熱點,不時碰到佢哋三五成群喺呢度練車,有d仲係一家大細添!

路上一個主要景點就係 Johnston Canyon,向山上行大概1.5公里就到逹一個瀑布。行山徑依住峽谷而建,部分重係懸空嘅棧道,喺上面行走可以望到腳下洶湧嘅急流,有特色之餘又唔會覺得驚險,幾得意㗎!





離開 Johnston Canyon 後再踩冇幾遠就到逹 Banff。起初仲以為呢個山上小鎮應該跟 Jasper 同 Lake Louise 差唔多,但出乎意料之外地,竟然好有規模,除咗商店食肆林立之外,酒店選擇亦唔少,而我哋入住嗰間好近購物區,十分方便。

下午自由活動,嚟到呢個咁出名嘅 Banff,梗係要爭取時間觀光嘅觀光,shopping 嘅 shopping,各自各精采啦!最開心係我女友喇,佢餓咗幾日冇得 shopping 今日終於可以 shop 餐飽咯!



晚上領隊仲帶我哋上琉璜山一個露天温泉泡湯,同時欣賞月色。幾日以嚟嘅疲勞真係一泡而空,嗰晚都瞓得特別甜啦。
返回列表