返回列表 回復 發帖

兩個轆去洛磯山四圍LOOK-Day 3

今日真係既興奮又緊張,一早整裝待發,因為終於去到我哋最期待嘅 Columbia Icefields Parkway 踩單車。領隊話雖然只喺50公里,但因為尾段要上斜,所以路程都幾具挑戰性。佢仲話過咗今日就有好日子過喎。

同昨日差唔多,大部份嘅山路坡度不大,所以都幾容易踩。但到咗個好靚嘅 viewpoint 時,領隊就吩咐大家要食番 d snacks 補充返吓,因為接著落嚟嗰段路就係全程最斜嘅一段,所以大家就襯機會好好休息,但休息之餘亦唔放過任何機會到處影相。





領隊果然冇講大話,上山嗰段路雖然只得大概5公里,但踩得都幾辛苦,好采之前補充咗同休息夠,加上憑住將困難征服嘅動力,山頂好快就上到,換嚟嗰份滿足感就算幾辛苦都值得喇!跟住嘅就係一大條又直又平嘅路,而喺路嘅盡頭就係一個大冰川。仲以為係 Columbia Icefield 添,但領隊話要過埋個彎先見到主角。雖然已經有d攰,但聽到領隊這番話就精神起來,繼續向目標進發!



而我一向醒目嘅女友當然係選擇坐支援車上山喇。當車經過我身邊時見我身水身汗,佢仲笑得好開心添! 見佢咁得戚,我之後唯有同佢講我嗰份滿足感佢永遠都感受唔到㗎喇,但佢好似唔係好buy。

好快就到咗我哋今晚入住嘅酒店,原來正正坐落係 Athabasca Glacier 對面,所以有整個下午嘅時間去探索呢個咁出名嘅冰川。之前淨係上網睇過d相,現在終於可以親身體驗坐上個車轆高過我嘅巨型旅遊巴進入冰川,之後再玩埋新開嘅 Glacier Skywalk,真係大開眼界!







之後更跟領隊走到個冰川嘅最前方,親眼目睹地球變喛對冰川所做成嘅破壞。從舊相片中見到,酒店原來就建於冰川旁,但現在就要走最少1.5公里嘅路先至去到這個冰川的尖端,而且佢嘅厚度亦以每年5米的速度遞減。據加拿大國家公園估計,整個冰川會喺一個世代嘅時間內消失。所以,仲未到過硌磯山玩嘅朋友就嚫早去喇!





唔講你唔知,住係呢間酒店嘅另一大好處就係一早一晚,當其它遊客走晒之後我哋就樂得清靜,可以真正地享受這嘅絕世美景及盡情影相。全間酒店只得39間房,價錢當然有番咁上下,唔係咁多團會選擇係度住。





返回列表