返回列表 回復 發帖

兩個轆去洛磯山四圍LOOK-Day 2

本帖最後由 EdCottontail 於 2015-4-1 06:28 編輯

第二日重頭戲係 Mount Edith Cavell 同埋 Athabasca Falls。

因為上 Mt. Edith Cavell 條路又窄又斜,當地政府唔準踩車上山。其實我心裡面都唔知幾開心,因為唔想第一日就要係女友面前推車或中途上支援車咁瘀,破壞晒我係佢心目中嘅形像。上到山真係另一番景界,一個被雪山包圍住嘅 Angel Glacier 突然在眼前出現。落車後就見到一個由冰川溶化而形成嘅湖,粉藍色嘅湖水上面漂浮着大大小小嘅冰塊。突然聽見隆隆巨響,原來喺雪崩嘅聲音,之後就見冰塊跌入湖中,令我哋眼界大開。









落山就正式展開我哋今次嘅單車之旅向 Athabasca Falls 進發。沿途隨時隨地可以停低影相,真係比坐車旅行自由自在得多。



為咗方便我哋踩到邊食到邊,支援車上早已準備好我哋嘅午餐,而且更揾到一個靚位停低,等到大隊到達時所有嘢都已經準備好哂,認真細心。對住咁靚嘅風景食 lunch 都特別開胃d。

未到 Athabasca Falls 就已經聽到隆隆嘅流水聲,可想而知個瀑布有幾雄偉。鍾意影相嘅我同鍾意被人影嘅女友當然玩得好開心,一玩就45分鍾。眼見其它巴士團嘅遊客平均只係停留15-20分鐘,真係有d戥佢哋可惜。







今晚住宿嘅 resort 係全木建築,而我哋住嘅 cabin 好有特色,俾到我哋百分百度假 feel。





Resort 附近有另外一個瀑布,雖然比唔上 Athabasca Falls 雄偉,但都值得一遊。





晚飯就喺 resort 食 bbq 大餐,有人燒埋送到我哋面前,翹埋雙手就有得食認真過癮。

雖然上落 Mount Edit Cavell 都唔駛踩單車,而且路面都算平坦,但其實全日都踩咗60公里,作為熱身啱啱好。
返回列表